幾日前．．．諗住去商場買少少野．點知一泊好架車，一開門，突然有一陣大風，將車門大力吹開．車門撞爛隔籬車個側鏡同度門．我呆一陣．我心裡掙扎．諗下好唔好開車一走了之．反正冇人睇到．如果留低自己嘅資料，對方一定要我賠賞．分分鐘要成千蚊加幣．

老實講，正常人都會走去就算．但另一方面，如果受害嘅係自己，人地咁樣撞到我架車，自己一定好嬲，更會覺得自己好無辜．要自己拎錢出黎整返架車．

最後都寫低張字條．寫低自己個名同電話號碼放晌對方嘅擋風玻璃窗上面．入到Scarborough Town Center．我一直悶悶不樂．問自己係唔係好傻．如果對方開天殺價，我應該點做呢？如果對方打黎，破口大罵，我應該點反應呢？

到夜晚，佢終於打黎喇．雖然佢講英文，但一聽，就聽得出係大陸人．佢好客氣咁同我講，好多謝我留低聯絡電話．比著第二個，就會走去．而我就唔知講咩好，祇可以講對唔住，再話俾佢聽，叫佢去車房問價．祇要係合理嘅，我一定會賠返俾佢．

過幾日，佢太太打黎，話要一千四佰九十蚊．

唉，我都知佢地唔會咁大方，搵間平嘅車房整．不過一去原廠整，點都唔會平．後來講到一千二佰蚊．俾埋錢．事情總算告一段落．

究竟我應該對自己嘅戇直作檢討？定係為自己嘅戇直而驕傲？

戇直而驕傲!!!!!!!
有一句話  "傻人有傻福"
我覺就件事, 自己誠實, 其實相對你會過得開心D
但如果你知道自己做錯野, 但係度逃避, 要日日係度諗, 死啦會唔會俾人知, 我咁做有冇做錯, 日日心心掛掛
咁我會做一個人地眼中GE傻仔 XDDD

而且為戇直作檢討??有冇搞錯, 檢討自己過於成實?? 又有一句話, "錯就要認,打就要企定" XDD

註: 戇直=/≠傻?? XDD

引用:

原帖由 蘆葦 於 2007-10-19 07:39 發表
戇直而驕傲!!!!!!!
有一句話  "傻人有傻福"
我覺就件事, 自己誠實, 其實相對你會過得開心D
但如果你知道自己做錯野, 但係度逃避, 要日日係度諗, 死啦會唔會俾人知, 我咁做有冇做錯, 日日心心掛掛
咁我會做一個人地眼 ...

其實我當時係怕！因為神係現場嘅目擊證人